Лөкөчөөҥҥө "Күн Айыы" балаҕаҥҥа сэргэх көрсүһүү буолан ааста

Олунньу 15 күнүгэр Лөкөчөөҥҥө "Күн Айыы" балаҕаҥҥа сэргэх көрсүһүү буолан ааста. Көрсүһүүнү талааннаах кыыспыт Христина Сергина тойугунан аста. Балаҕан хаһаайката Лидия Ксенофонтова Аал уотун оттон, ыалдьыттары алгыстаах алаадьынан, кыынньа сылдьар кымыһынан күндүлээтэ. Ийэлэргэ аналлаах балаҕан буоларынан, "Лөкөй" уоланнар бөлөхтөрө биир дойдулаахпыт Иван Гоголев- Кындыл "Ийэлэр уонна биһиктэр" диэн хоһоонун ааҕан, көрөөччүлэри ордук сэргэхситтилэр. Көрсүһүүгэ Дьокуускай куораттан "Кистэлэҥ күүс" сурунаал учредителэ,  "Үүтээн" сынньанар киин хаһаайката, "Все 32" стоматологическай клиника директора, Россия суруналыыстарын союһун чилиэнэ Марина Платонова- Хомпорууна уонна турист Катя Слепцова ыалдьыт буолан кэлэн, үлэлэрин тустарынан кэпсээн, олохтоохторго интэриэһинэй киэһэни бэлэхтээтилэр. Саха Республикатын уонна Бүлүү улууһун бочуоттаах бэтэрээнэ, бочуоттаах учуутал Христина Николаевна күндү ыалдьыт буолла. Ону тэҥэ балаҕаҥҥа толору мустубут нэһилиэкпит Далбар Хотуттара, дьиэтээҕи түбүктэн сынньанан, аралдьыйан, саҥаны истэн, билэн,  бары да астынан тарҕастылар.